សាលាមធ្យមវិចិត្រសិល្បៈ

អំពី
សាលាមធ្យមវិចិត្រសិល្បៈ

ស្ថិតក្រោមឱវាទរបស់ក្រសួងវប្បធម៌និងវិចិត្រសិល្បៈ និងមានប្រវត្តិអតីតកាលដ៏វែងឆ្ងាយ សាលាមធ្យមវិចិត្រសិល្បៈ (ស.ម.វ.ស.) ជាគ្រឹះស្ថានសិក្សាសិល្បៈជាតិដ៏ធំតែមួយគត់នៅក្នុងប្រទេសដែលកសាងមូលធនមនុស្សលើវិស័យសិល្បៈវប្បធម៌ដែលជាអត្តសញ្ញាណជាតិ ពីកម្រិតបឋម (ថ្នាល១ឬថ្នាក់ទី៤) ដល់កម្រិតមធ្យមសិក្សាបច្ចេកទេស (ថ្នាក់ឆ្នាំទី៦ឬថ្នាក់ទី១២) ប្រកបដោយគុណភាព សមត្ថភាព និងជំនាញច្បាស់លាស់។ បេសកកម្មចម្បងរបស់សាលាមធ្យមវិចិត្រសិល្បៈគឺអភិរក្ស ថែរក្សា បណ្តុះបណ្តាល និងផ្ទេរចំណេះជំនាញនិងបទពិសោធន៍លើវិស័យសិល្បៈទស្សនីយភាព និងសិល្បៈសូនរូបទាំងទម្រង់បុរាណ និងសម័យប្រកបដោយគុណភាពសម្រាប់មនុស្សជំនាន់ក្រោយ។ គិតពីឆ្នាំសិក្សា១៩៨១ ដល់បច្ចុប្បន្ន សិស្សដែលបានបញ្ចប់ការសិក្សាដោយជោគជ័យពីសាលាមធ្យមវិចិត្រសិល្បៈមានចំនួនសរុបជិត៥ពាន់នាក់ ដែលភាគច្រើនបម្រើការងារក្នុងក្របខណ្ឌក្រសួងវប្បធម៌និងវិចិត្រសិល្បៈជាអ្នកថែរក្សានិងអភិរក្សមរតកវប្បធម៌ជាតិ មួយផ្នែកជាគ្រូបង្រៀននៅតាមគ្រឹះស្ថានសិក្សាសាធារណៈនិងឯកជន មួយចំនួនទៀតជាសិល្បករក្រៅប្រព័ន្ធ និងអតីតសិស្សខ្លះកំពុងបន្តការសិក្សានៅតាមសាកលវិទ្យាល័យក្នុងប្រទេសនិងក្រៅប្រទេស។

ការបណ្តុះបណ្តាល

ចំពោះមុខ សាលាមធ្យមវិចិត្រសិល្បៈធ្វើការបណ្តុះបណ្តាលកម្រិតសញ្ញាបត្រសិល្បៈ(មធ្យមសិក្សាបឋមភូមិ) និងកម្រិតស្នាតកបត្រសិល្បៈ(មធ្យមសិក្សាទុតិយភូមិ) លើមុខជំនាញដូចជា៖

១. ផ្នែករបាំ

របាំបុរាណ, របាំប្រពៃណី, ល្ខោនខោល

២. ផ្នែកល្ខោន

ល្ខោនបាសាក់, ល្ខោនយីកេ, ល្ខោននិយាយ

៣. ផ្នែកសៀក

លំនឹង, ទន់ភ្លន់, ត្រែះ, អាក្រូបាត

៤. ផ្នែកតូរ្យតន្រ្តី

តន្រ្តីបុរាណ៖ ទ្រអ៊ូ, ទ្រសោ, តាខេ, ឃឹម, គងធំ, គងតូច, រនាតឯក, រនាតធុង, ស្រឡៃ, ប៉ីអ, ប៉ីពក, ខ្លុយ, ទ្រខ្មែរ, ខ្សែដៀវ, ចាប៉ីដងវែង
តន្រ្តីសម័យ៖ ព្យាណូ, វីយូឡុង, វីយូឡា, រីណែត-ត្រុំប៉ែត-ត្រុំប៊ន-សាក់សូ-សែលឡូ-ហ្លុត-កុងត្រឺបាស-ហ្គីតា-គ័រ
ចម្រៀង៖ ចម្រៀងបុរាណ, ចម្រៀងជាពួក, អាយ៉ៃ

៥. ផ្នែកសិល្បៈសូនរូប

គំនូរ៖ គំនូរវិចិត្រកម្ម, គំនូរបុរាណ, គំនូរផ្សាយ, លម្អក្រណាត់
ចម្លាក់៖ ចម្លាក់ពុម្ព, ចម្លាក់ប្រាក់, ចម្លាក់ស្មិត, ចម្លាក់ឈើ, កុលាលភាជន៍, ខ្មុកស្មាច់

បន្ថែមពីលើមុខជំនាញសិល្បៈ សាលាក៏បានបញ្ចូលកម្មវិធីសិក្សារបស់ក្រសួងអប់រំ យុវជន និងកីឡា ដើម្បីផ្តល់ឱកាសឱ្យសិស្សានុសិស្សទទួលបានទាំងចំណេះដឹងទូទៅ និងបច្ចេកទេសជំនាញ ប្រកបដោយក្រមសីលធម៌ ស្របទៅតាមការរីកចម្រើនរបស់សង្គមជាតិ និងឆ្លើយតបទៅនឹងតម្រូវការទីផ្សារការងារជាក់ស្តែង។ ជារួមសិស្សដែលបានឆ្លងកាត់ប្រព័ន្ធអប់រំនិងបណ្តុះបណ្តាលនៅសាលាមធ្យមវិចិត្រសិល្បៈនឹងក្លាយទៅជាធនធានសិល្បករប្រកបដោយវិជ្ជាជីវៈ និងគរុកោសល្យពេញលេញដែលអាចផ្ទេរចំណេះជំនាញ ថែរក្សា អភិរក្ស និងលើកស្ទួយមរតកវប្បធម៌ជាតិឱ្យបានថ្កុំថ្កើនទៅអនាគត។

ចក្ខុវិស័យ

ជាចក្ខុវិស័យសម្លឹងទៅមុខ សាលាមធ្យមវិចិត្រសិល្បៈនឹងប្រែក្លាយខ្លួន «ជាគ្រឹះស្ថានសិក្សាឈានមុខស្តង់ដាគំរូ និងជាថ្នាលបណ្តុះវប្បធម៌ប្រកបដោយគុណភាពនិងប្រសិទ្ធភាព»។ សាលាមធ្យមវិចិត្រសិល្បៈប្តេជ្ញាបន្តបេសកកម្មរបស់ខ្លួនក្នុងការកសាងមូលធនមនុស្សក្នុងវិស័យវប្បធម៌ប្រកបដោយចំណេះដឹង ចំណេះធ្វើ សីលធម៌ និងមានបំណិនសតវត្សរ៍ទី២១ តាមរយៈការពង្រឹងអភិបាលកិច្ច ការអនុវត្តស្តង់ដារសាលារៀនគំរូ ការកែសម្រួលក្របខណ្ឌកម្មវិធីសិក្សា ការលើកកម្ពស់សមត្ថភាព/គុណវុឌ្ឍិគ្រូបង្រៀន និងការកែលម្អហេដ្ឋារចនាសម្ព័ន្ធរូបវ័ន្ត/ឌីជីថល។ ឈរលើស្មារតីនេះ សាលាមធ្យមវិចិត្រសិល្បៈចាត់ទុកការបញ្ជ្រាបចំណេះដឹងសិល្បៈវប្បធម៌ និងការលើកកម្ពស់ការយល់ដឹងអំពីអត្តសញ្ញាណជាតិដល់យុវជនជំនាន់ក្រោយ ជាយន្តការគន្លឹះនិងអាទិភាពសំខាន់ក្នុងការរួមចំណែកអភិវឌ្ឍធនធានមនុស្សប្រកបដោយប្រសិទ្ធភាពនិងចីរភាព ស្របតាមយុទ្ធសាស្រ្តបញ្ចកោណដំណាក់កាលទី១ និងគោលនយោបាយជាតិស្តីពីវប្បធម៌។